Marahil ay maituturing mo ng swerte ang iyong sarili kung ikaw ay makakapulot o makakakita ng pera, lalo na kung ito ay nakita mo mismo sa loob ng iyong tahanan.

Katulad na lamang ng nangyari sa mag-asawang ito na hindi inakala na makakatagpo ng isang bagay mula sa bahay na kanilang binili sa Phoenix, Arizona.

Base sa ulat mula sa azcentral news site, ang kwento tungkol sa mag-asawang sina Eddie at Angie mula sa Phoenix ay kumalat sa social media dahil sa isang vault na natagpuan nila sa kanilang bahay.


Ayon sa ulat, ipinapaayos umano nina Angie at Eddie ang kanilang kusina. Ngunit, habang ginigiba ng mga manggagawa ang tiles ng kanilang sahig ay mayroon silang natagpuan na isang misteryosong safe.

Bukod pa don, hindi din inakala ng mag-asawa na makikita nila ang mga numberong kumbinasyon ng taguan kaya ito ay kaagad din nilang binuksan para makita ang laman nito.

Sa mga larawan na ibinahagi ng mag-asawa, makikita ang tinatayang $51,080 sa loob ng safe. Base sa mga larawan ay makikita na maayos pa itong naka-bundle. Maliban sa pera na nilalaman nito, ito ay mayroon ding isang bote ng bourbon na may tatak na James E. Pepper.

Nakakita din ang mag-asawa sa naturang safe ng isang mensahe at libro na may pamagat na "A Guide for the Perplexed" na inilabas noong 1977. 

Mayroon ding isang card sa loob ng taguan at mapa ng syudad ng Mesa na may markang X na tila ba ito ay ginamit sa pagte-treasure hunt. 

Bukod sa mga ito, mayroon din sa taguan ang lumang larawan ng isang lalaki kung saan sa likod nito ay mayroong mensahe na sinasabing, "Alan, I have a book you must read. I've underlined a few key passages. Your friend, Vincent."

Saad ni Angie sa caption na ang safe o taguan na kanilang natagpuan ay tila nasa 10 hanggang 20 taon na. Dagdag pa niya, posibleng ang taguan ay nagmula sa taong 1990s, ang card na mula sa 1960s, at ang libro ay 1970s.